புத்தகங்கள் பற்றிய பார்வைகளைப் பதியும் எங்கள் வலைப்பூ - http://puththakam.wordpress.com/

Wednesday, November 30, 2022

போர்நிறுத்தம்

முன்னோடிய நாயும்
பின்னோடிய புலியும்
தின்னாமலும்
தின்னப்படாமலும்
மூடிய கழிவறை மூலைகளில்.

– ஞானசேகர்

Saturday, October 01, 2022

Man disposes, God proposes

நகராது
ஓடாது
செல்லவே செல்லாதென
அடியேன் உண்டியலிட்ட
பத்து ரூபாய்
ஒற்றை நாணயத்தையும்
சேர்த்தா சாமீ
உனது வசூல் ரெண்டு கோடி?

- ஞானசேகர்

Wednesday, August 31, 2022

கிரகம்

கிழமைகளில்
ஐந்து கோள்கள் காணலாம்

வெறும் கண்களில்
ஆறு கோள்கள் காணலாம்

நல்ல தொலைநோக்கியில் இன்னும்
மூன்று கோள்கள் காணலாம்

அதிலொன்று
கோளே இல்லை என்றும் காணலாம்

ஆனால்
ஒன்பது கோளும் ஒன்றாய்க் காண
பிள்ளையார்ப்பட்டி வர வேண்டும்.

- ஞானசேகர்

Thursday, April 07, 2022

பொருநர் சீர்

அரசு வேலை கிடைத்தால்
உயிரே காணிக்கை என
வேண்டிக் கொண்ட ஒருவன்
மன்னார்குடி பேஸன்சரில் பாய்ந்து
நேர்த்திக் கடன் முடித்ததைச்

சிரசற்று கரும்புகைசூடி
சாபவிமோசனம் பெற்ற
கிங்கணனொருவன்
வேலைக்குத் திரும்பியதாகக்
கொண்டாடினார்கள்.

- ஞானசேகர்