சமரன் 4.0

போரடித்த பொழுதொன்றில்
நாடு வல்லரசாக
கனவொன்று கண்டான்

போர்கள்
வல்லரசுகள் செய்WARகள்
என பேஸ்புக்கில் கண்டான்

போர்கள்
யுத்தங்கள்
ஜனாதிபதி கைப்பொத்தான்கள்
என ஃபார்WARடுகள் பார்த்தான்

போராடி BARராடி
விழுந்தெழுந்து முட்டிவெட்டி கிழித்தொட்டி
கனவை நனவாக்கினான் 

அப்துல்  கலாம் சிகையை
முடியில்லாத தலைவனின்
உச்சியில் பொருத்தி
ஊரெல்லாம் ஒட்டினான்
'திரையுலகின் நிரந்தர ஜனாதிபதியே!'

– ஞானசேகர்

சிறப்புரை

தக்ஷிண பிரதேச
வடக்கு மாவட்ட
தெற்கு மண்டல
மத்திய மைய
ஒன்றிய பாசறை
செயலாளர்.

- ஞானசேகர்

கூட்டறிவு

அலைபேசிகளில் குனிந்த தலைகள்
நிமிர்ந்து நிற்கிறது
பொத்தான் அழுத்தப்படாத மின்தூக்கி.

- ஞானசேகர் 

நோக்கக் குழையும்

Welcome to Cemetery!

– ஞானசேகர்

அகம் புறம்

கருவறைக்குள் விடாமல்
முன்னிரவில் முறைத்துக் கொண்டு முதுகு காட்டியவளை
வாசலில் நிறுத்திவிட்டு
கருவறை போய் வேண்டி வருவேன்
அவளுக்குள் சிந்தாமல்
முடிச்சிட்டு வைத்த ஆணுறையுடன்.

- ஞானசேகர்

பல்

கனவுகளின் கதைகளில்
மொத்தமே திரைக்கதைகள் ஆறுதான்

துரத்தப்படுவது
பறப்பது
கீழே விழுவது
உடுத்தியவர்கள் நடுவில் நிர்வாணமாக நிற்பது
தேர்வுகளில் திணறுவது
பல் விழுவது

மற்றவை பலமுறை கண்டிருப்பினும் தோழர்காள்
பல் மட்டும் விழுந்ததேயில்லை கனவுகளில் தோழிகாள்

பொதுவெளி கடற்கரைகளில் விரட்டப்பட்டு
தனியார் நட்சத்திர விடுதிகளில் காசுகட்டி
போதை வாகனமோட்டிகளுக்குத் தப்பி
நீங்கள் வீடுதிரும்பிய புத்தாண்டிரவில்
கனவொன்று கண்டேன்

தமிழ் முதல்தாள் தேர்வு
ஒரிசாவில் தேர்வு மையம் 
கேள்விகளெல்லாம் இந்தியில்
திணறுகிறேன்
ஆடைகளை வெட்டி சோதித்து வெளியேற்றுகிறார்கள்

ஆஸ்கார் நாயகிகள் அலங்காரத்துடன்
மழைநீர் வடிகால் பள்ளங்களைப்
பொறுமையாகக் கடக்கும் என்னை
வாகனத்தின் மேலிருந்து
பத்தாவதாகக் குறிபார்க்கிறது ஒரு துப்பாக்கி
கூட்டத்தோடே ஓடுகிறேன்
துரத்துகிறார்கள்

சென்னைக்கு விடுமுறை தந்த புயலொன்று
வழக்கம்போல் திசைமாறி
ஏனோ என்னை மட்டும் தாக்கித் தூக்குகிறது
பறக்கிறேன்

சொந்தமாக விமானமில்லாத எந்நாட்டில்
சொந்தமாக விமானமுள்ள யாரோ
புயலின் கண்ணில் ஏதோ செய்ய
அதை நான் கண்டுவிட
விரட்டுகிறார்கள் ஆகாயத்தில்
கீழே விழுகிறேன்

கரையைக் கடந்து விழுகிறேன்
மாமல்லபுரத்தில் அல்ல 
ஒரு மூடப்பட்ட கழிவறையில்
கதவை உடைத்து நுழைகிறார்கள்
நேர்த்தி உடையுடன் சுற்றி நிருபர்கள்
முன்னால் முன்னாள் நடிகையொருத்தி
முன் பொத்தான் திறந்தபடி

நான் மட்டும் நிர்வாணமாக
நெருங்குகிறாள் என் முகம் நோக்கி
நீட்டுகிறாள் மைக்கை என்னிடம்

'சொல்லுங்க!
உரக்க இந்த உலகத்துக்கு!
கனவில் கூட வீழாத
பற்கள் உங்களுடையதென்று!
அதற்குக் காரணம்
இந்த பேஸ்ட்டுதான் என்று!
ஈ ஈ ஈ ஈ ஈ......'

– ஞானசேகர் 

போர்நிறுத்தம்

முன்னோடிய நாயும்
பின்னோடிய புலியும்
தின்னாமலும்
தின்னப்படாமலும்
மூடிய கழிவறை மூலைகளில்.

– ஞானசேகர்

Man disposes, God proposes

நகராது
ஓடாது
செல்லவே செல்லாதென
அடியேன் உண்டியலிட்ட
பத்து ரூபாய்
ஒற்றை நாணயத்தையும்
சேர்த்தா சாமீ
உனது வசூல் ரெண்டு கோடி?

- ஞானசேகர்

கிரகம்

கிழமைகளில்
ஐந்து கோள்கள் காணலாம்

வெறும் கண்களில்
ஆறு கோள்கள் காணலாம்

நல்ல தொலைநோக்கியில் இன்னும்
மூன்று கோள்கள் காணலாம்

அதிலொன்று
கோளே இல்லை என்றும் காணலாம்

ஆனால்
ஒன்பது கோளும் ஒன்றாய்க் காண
பிள்ளையார்ப்பட்டி வர வேண்டும்.

- ஞானசேகர்

பொருநர் சீர்

அரசு வேலை கிடைத்தால்
உயிரே காணிக்கை என
வேண்டிக் கொண்ட ஒருவன்
மன்னார்குடி பேஸன்சரில் பாய்ந்து
நேர்த்திக் கடன் முடித்ததைச்

சிரசற்று கரும்புகைசூடி
சாபவிமோசனம் பெற்ற
கிங்கணனொருவன்
வேலைக்குத் திரும்பியதாகக்
கொண்டாடினார்கள்.

- ஞானசேகர்

பார்க்குள்ளே நல்ல நாடு

ஊக்க
மது
கைவிடேல்.

- ஞானசேகர்

அகவை தினம்

இன்றுபோல் என்றும் வாழ்க
நீங்கள் வாழ்த்திய நாளில்
வயிற்றுப்போக்கு.

– ஞானசேகர்

you see

f_ _k என்ற கேள்விக்கு
o r என்பது பதில்
இதுதான் சமச்சீர் கல்வி!

– ஞானசேகர்

மண்டி

காத்மண்டு நிறுவன பொருட்கள்
நியூசிலாந்தில் திட்டமிடப்பட்டு
வியட்நாமில் வடிவமைக்கப்பட்டு
ஆஸ்திரேலியாவில் அமோகமாக விற்பனையாவது
பல நேபாளிகளுக்குத் தெரியாது.

- ஞானசேகர்

மலர்ந்தே தீரும்

ப்ரஹ்மண்யாதாய கர்மாணி ஸங்கம் த்யக்த்வா கரோதி ய:।
லிப்யதே ந ஸ பாபேந பத்மபத்ரமிவாம்பஸா
‍- பகவத் கீதை 5:10

தாங்கும் திரள்களில்
தப்பி மேலேறும்
அசட்டுத் துளிகளை
உச்சியில் நிறுத்தி
எல்லையெல்லாம் உருட்டித் தாலாட்டி
நாடி நரம்பெல்லாம் தழுவி முறுக்கி
மின்னும் பல நிறங்களாய் ஒளியூட்டி
பரிசுத்த வடிவமாய்க் காட்டி பரப்பி
கசடெல்லாம் அவற்றோடு ஒட்டி ஒட்டி
காற்றலை மோதிச்
சாயும் சமயத்தில்
கோளவுரு கசட்டுத் துளிகளை
அலங்கோலமாய் மீண்டும்
திரளுக்குள் தள்ளுமாம் தாமரை!

-‍ ஞானசேகர்

திரைமறைவுப்பிம்பம்

கௌரவத் தோற்றத்தில்
சில்க் சுமிதா

என ஆரம்பித்தது திரைப்படம்

என முடிந்தது கவிதை!

-‍ ஞானசேகர்

ஜான்ஸி ராணியும் ரசியா சுல்தானாவும்

Gupta & Daughters
என்ற பெயர்ப்பலகைக்காக‌
குப்தாவின் செய்தி ஊடகங்களில் வந்தது

& Sons காலத்தில்
பெண்களை மதிக்கும் குப்தாவை
அனேகர் likeகினர்
அனேகர் shareரினர்
அனேகர் commentடினர்
புகழ் பெற்ற குப்தா
வியாபாரம் பெருக்கினார்

Gupta & Daughters செய்திகளில்
குப்தாவின் மகன் பற்றிய
கவலை யாருக்குமில்லை
மகன் இருந்தானா?
இறந்தானா?
மூளைச்சாவடைந்தானா?
திரும்பி வந்தானா?
திருமணம் செய்தானா?
கவுரவமாக வாழ்ந்தானா?
கவுரவக் கொலையானானா?
குறைந்தபட்சம்
குப்தாவின் மறுமணங்களுக்காவது
குப்தாவின் மகன் துண்டுதலாய் இருந்தானா?
ஊடகங்கள் சொல்லவில்லை

உண்மையில்
குப்தாவைக் கொண்டாடும்
நமக்கான‌ செய்திகளில்
குப்தாவின் மகள்கள் பற்றிய‌
கேள்விகளும் யாருக்கும் இல்லை
எத்தனை மகள்கள் என்பதைவிட‌
குப்தாவைப் போலவே
குப்தாவின் மகள்களுக்கும் பெயர்களேயில்லை

எனவே
குப்தாவைக் குப்தா
நீக்கும் செய்தி தவிர‌
குப்தாவைப் பற்றி
வேறொன்றும் என்னை வசீகரிப்பதில்லை

குப்தாவைக் குப்தா
நீக்கும் நாளில்
குப்தாவைப் போலவே
குப்தாவின் மகள்களுக்கும்
பெயர்கள் கிடைக்கும் என்பதால்
ஒரு மகனுக்காக அவர் காத்திருக்கத்
தேவையில்லை என்பதால்
குப்தாவைக் குப்தா
நீக்கும் செய்திக்காக‌
நாமும் காத்திருப்போம்
குப்தாவின் மகள்களைப் போலவே!

- ஞானசேகர்

அந்த இடத்தில்

அந்த இடத்தில்
ஒரு தகப்பன்
தாவணி மகளைத்
தொட மாட்டான்

தகப்பனான கதாநாயகன் சினமாக‌
கருத்து சொன்ன‌
உதவி இயக்குனன் வேலையிழந்தான்

அந்த இடத்தில்
தொட்ட திரைப்படம்
பெரும் வெற்றி பெற்றது

உதவி இயக்குனன்
இயக்குனன் ஆனான்
கதாநாயகன் ஆனான்
அந்த இடத்தில்
கதாநாயகியைத் தானே தொடும்
காட்சியும் வைத்து
பெரும் வெற்றி பெற்றான்

அந்த இடத்தில்
வெற்றி தொடும் கதாநாயகர்கள்
காலங்காலமாக வந்து கொண்டிருக்கிறார்கள்

அந்த இடத்தில்
இருந்த‌ கதாநாயகிகள்
காலங்காலமாக தொலைந்து போகிறார்கள்

- ஞானசேகர்

குந்தியிருந்த இடம்

காதல் சின்னமான‌
இதயத்தை ஒத்திருந்தது
அமர்ந்தெழுந்த இடத்தில்
கடற்கரையில் பதிந்த தடம்.

- ஞானசேகர்

வீடு வாடகைக்கு: Strictly vegetarian only

அதனால் எகிப்து நாடெங்கும் இதற்கு முன்னும் பின்னும் இருந்திராப் பெரும் கூக்குரல் உண்டாகும். ஆயினும், இஸ்ராயேல் மக்கள் அனைவரிடையேயும், மனிதர் முதல் மிருகங்கள் வரை யாரை நோக்கியும் ஒரு நாய் முதலாய்க் குரைப்பதில்லை. அவ்வித அதிசய அடையாளத்தின் மூலம், ஆண்டவர் எகிப்தியருக்கும் இஸ்ராயேலருக்குமிடையே வேறுபாடு காட்டுகிறாரென்று நீங்கள் அறிந்து கொள்வீர்கள்.
- விவிலியம் (யாத்திராகமம் 11:6,7)

புறவினத்தாரின்  வீடுகளும்
நம்மைப் போலவே இருப்பதால்
அடையாளம் தெரியவில்லை என்றார்கள்
கொள்ளை நோயின் தூதர்கள்.

'இது என் கட்டளை
இதுவே அடையாளம்
நம் இனத்தார் வீடுகளில்
வரும் ஞாயிற்றுக் கிழமை கரவொலி'
வாழ்த்துச் சொல்லி அனுப்பினார்
கொள்ளை நோயின் கடவுள்.

எதிரொலி குழப்பிவிட்டதாக
முறையிட்டார்கள்
கொள்ளை நோயின் தூதர்கள்.

'இது என் கட்டளை
இதுவே அடையாளம்
நம் இனத்தார் வீடுகளில்
வரும் ஞாயிற்றுக் கிழமை தீபவொளி'
வாழ்த்துச் சொல்லி அனுப்பினார்
கொள்ளை நோயின் கடவுள்.

புறவினத்தார் சிலரும் ஏற்றிவிட்டதாக
முறையிட்டார்கள்
கொள்ளை நோயின் தூதர்கள்.

'இனி கட்டளையும் இல்லை
இதுவரையானது அடையாளமும்  இல்லை.
செய்யச் சொல்வதைச் செய்யாததும்
செய்யச் சொல்லாததைச் செய்வதும்
புறவினத்தார் புத்தி.
வரும் ஞாயிற்றுக் கிழமை
தீபவொளியோ கரவொலியோ இருக்கும் வீடுகள்
புறவினத்தார் வீடுகள்
இதுவே அடையாளம்'
வாழ்த்துச் சொல்லி அனுப்பினார்
கொள்ளை நோயின் கடவுள்.

துல்லியமான பட்டியலுடன் திரும்பினார்கள்
கொள்ளை நோயின் தூதர்கள்.

– ஞானசேகர்